ព្រះសីហនុ៖ យ៉ាងហោចណាស់មានមនុស្សប្រុសស្រីជាង ១០០នាក់ ចម្រុះជាតិសាសន៍បានជាប់គាំងក្នុងសណ្ឋាគារឡិមុន ខណៈពេលដែលអគ្គីភ័យបានឆាបឆេះពីជាន់ផ្ទាល់ដី ហើយអាគារមានកម្ពស់រហូត ៨ជាន់ ប៉ុន្តែភ្លាមៗនោះត្រូវបានអាជ្ញាធរ និងសមត្ថកិច្ចសង្គ្រោះបានទាន់ពេលវេលា។
ហេតុការណ៍អគ្គីភ័យខាងលើនេះបានកើតឡើង នៅវេលាម៉ោង៩កន្លះយប់ថ្ងៃទី១៩ ខែមករា ឆ្នាំ២០២៣ នៅម្តុំខាងក្រោយកាស៊ីណូជិនប៉ី១ សណ្ឋាគារដែលឆេះមានឈ្មោះថា សណ្ឋាគារឡិមុន ដែលស្ថិតនៅក្នុងភូមិ៤ សង្កាត់លេខ៤ ក្រុង/ខេត្តព្រះសីហនុ។
ក្រោយពីទទួលបានដំណឹងនេះភ្លាមអាជ្ញាធរមានសមត្ថកិច្ចថ្នាក់ក្រុងនិងខេត្តបានចេញមកកន្លែងកើតហេតុនិងបានជួយអន្តរាគមន៍ទាន់ពេលវេលា ក្នុងនោះសមត្ថកិច្ចប្រើប្រាស់ទឹកពន្លត់អគ្គិភ័យឲ្យរលត់ទៅវិញប្រើរប្រាស់ទឹកអស់ជាង ១០គ្រឿង ដែលជារថយន្តទឹកមកពីគ្រប់អង្គភាព និងសមត្ថកិច្ចបានជួយសង្គ្រោះអាយុជីវិតមនុស្សទាំងជនជាតិខ្មែរនិងចិនជាង ១០០នាក់ និងរងរបួស២នាក់ ។
សមត្ថកិច្ចសន្និដ្ឋានជាបឋមថា ករណីអគ្គីភ័យខាងលើនេះគឺឆាបឆេះបណ្តាលឲ្យពីឆេះទូហ្គេមបាញ់ត្រី ទើបបណ្តាលឲ្យមានផ្សេងខ្មួលខ្មាញ់ឆាប់ឆេះបែបនេះ៕
